میری ڈائری:انتخاب

• سب سے بڑی جنگ میدانوں میں نہیں، انسان کے دل اور دماغ کے درمیان لڑی جاتی ہے۔
  جب دل خواب دیکھتا ہے اور دماغ شک کرتا ہے، تو انسان اپنی ہی سوچوں میں الجھ کر رہ جاتا ہے۔ یہی وہ لمحہ ہوتا ہے جہاں ہم یا تو اپنی کمزوریوں سے ہار جاتے ہیں، یا پھر اپنے حوصلے سے جیت جاتے ہیں۔
  زندگی کا حقیقی کمال یہ ہے کہ انسان اپنی ذات کو پہچانے، اپنی خامیوں کو قبول کرے، اور اپنے اندر وہ روشنی تلاش کرے جو اندھیروں کو شکست دے سکتی ہے۔
  خود پر قابو پانا ہی اصل کامیابی ہے،خودسے ہار جانا سب سے بڑا نقصان ہے
• میں نے دیوار سے 2024 کا کیلنڈر اتارا اک نظر ڈالی جہاں
  مختلف تاریخوں پر رنگین دائرے بنے تھے
  کوئی دائرہ سیاہ تھا
  کوئی سفید
  کوئی زندگی کے سگنل سے گرین
  کوئی محبت کے رنگ سے نیلگوں
  تو
  بہت سے بےرنگ تھے
  جو بے رنگ تھے سب تیری یاد والے دن تھے
  میں نے کیلنڈر لپیٹا
  ربڑ چڑھایا
  اور
  اپنے سامان میں رکھ دیا۔
  ہمیشہ کے لیے
  تین سو پینسٹھ دن موتیوں پہ مشتمل اس لڑی کا پورا سال اس شخص کے نام کہ جس کے جانے پر ہزار دلاسے دئیے گئےمگر سکوں کا ایک سکہ بھی قدرت نے مرے کاسے میں نہیں ڈالا ان آوازوں کے نام جو آج بھی کانوں میں گونجتی ہیں "صبر صبر صبر, پھل میٹھا پھل”لیکن صبر کے اس ایک میٹھے پھل تک کا فاصلہ مجھ کو اندھے کنویں میں گرے ایک نابینا بچے کا دکھ سمجھا گیا