کراچی کا وہ جزیرہ جہاں کئی مذاہب کی برسوں پرانی عبادت گاہیں آج بھی موجود ہیں

گرجا گھر کے اندر سروسز جاری تھیں۔ خواتین و حضرات الگ الگ حصوں میں بیٹھے فادر سے انجیل مقدس کا کلام سن رہے تھے۔

فادر بورو منگو نے بتایا کہ اس گرجا گھر کو بنے 102سال ہو چکے ہیں۔ اس وقت منوڑا میں کیتھولک اور پروٹسٹنٹ عیسائیوں کے تقریباً 150 خاندان آباد ہیں۔

مذہبی ہم آہنگی کے حوالے سے ان کا کہنا تھا کہ ’یہاں کے مقامی چاہیے وہ مسیحی ہیں، مسلم یا ہندو، ان کے آپس میں اچھے تعلق ہیں۔‘

فادر نے مسکراتے ہوئے بتایا کہ ’منوڑا کی اصل خوبصورتی یہ ہے کہ جب یہاں مختلف مذاہب کی عیدیں آتی ہیں تو سب ایک دوسرے کو مبارکباد دیتے ہیں، کیک کاٹتے ہیں اور اسے بانٹتے بھی ہیں۔ ایک دوسرے کی خوشیوں اور دکھوں میں شامل ہوتے ہیں۔‘

انھوں نے مزید بتایا کہ ’پچھلے دنوں ہمارے ماسٹر جی کا ایکسیڈینٹ ہوا تو مسجد کے مولانا انھیں دیکھنے آئے تھے۔ یہ چیزیں ہمیں ایک دوسرے کے قریب لے کر آتی ہیں۔ یہ ہی نہیں بلکہ مقامی کشتی بانوں سے ہمارے اچھے تعلقات ہیں۔ یہ ہمیں کیماڑی سے منوڑا جزیرے پر لے کر آتے ہیں اور واپس لے کر جاتے ہیں۔‘

مذہبی تناؤ کے بارے میں ان کا کہنا ہے کہ دوسرے علاقوں میں یہ مسئلہ موجود ہے لیکن منوڑا میں اب تک کوئی ناخوشگوار واقعہ نہیں ہوا۔

ماسٹر ایمونیل بھٹی سنہ 1979 سے منوڑا کے رہائشی ہیں۔ گرجا گھر کی خدمت کرنے والے ایمونیل سمجھتے ہیں کہ منوڑا ملک کی دیگر جگہوں سے مختلف ہے کیونکہ یہاں مذہب کوئی مسئلہ نہیں۔

’یہاں سارے مذاہب کے لوگ ساتھ رہتے ہیں۔ اٹھنا بیٹھنا، کھانا پینا دکھ درد میں شامل ہونا، یہ ساری باتیں منوڑا کے ماحول میں شامل ہیں۔ یہاں جھگڑا نہیں ہوتا۔ جب ہمارا کرسمس اور ایسٹر آتا ہے تو لوگ ہمیں مبارکباد دیتے ہیں۔‘

ماسٹر ایمونیل نے بتایا کہ ملک کے دیگر حصوں میں جب مذہبی تشدد کا واقعہ ہوتا ہے تو اس کا اثر منوڑا پر نہیں پڑتا۔