سنہری نہریں، سرخ ساحل سمندر اور سحر انگیز نمک کی کانوں کے ساتھ ایران کا جزیرہ ہرمز جنت کے نظارے پیش کرتا ہے۔ اسے ’ماہرین ارضیات کا ڈزنی لینڈ‘ بھی کہا جاتا ہے۔
ایران کے جنوب میں واقع ہرمز جزیرے کے ساحل پر ہم ایک سرخ پہاڑ کے دامن میں کھڑے تھے جب میرے ٹوور گائیڈ فرزاد نے کہا کہ ’آپ کو اس مٹی کا ذائقہ چکھنا چاہیے۔‘
اس بلند پہاڑ کا سرخ سایہ ساحل اور پانی کی لہروں کو اپنی لپیٹ میں لے رہا تھا۔ میں نے گھبراہٹ میں اس مشورے پر عمل کرنے کا سوچا لیکن میں اب تک اس پُراسرار اور معدنیات سے بھرے منظر کو سمجھ نہیں پایا تھا۔
ایران کے ساحل سے آٹھ کلومیٹر دور خلیج فارس کے نیلے پانی کے بیچ و بیچ جزیرہ ہرمز اوپر سے آنسو جیسا دکھتا ہے۔ یہاں نمک کے ٹیلے ہیں جن میں مختلف پتھر، مٹی اور لوہے سے بھرپور آتش فشاں کی چٹانیں ہیں جو سرخ، زرد اور نارنجی رنگوں میں چمکتے ہیں۔ کیونکہ یہاں 70 سے زیادہ معدنیات پائی جاتی ہیں تو 42 مربع کلومیٹر پر محیط اس پُرکشش جزیرے میں ہر انچ اس کے بناوٹ کی کہانی بیان کرتا ہے۔
ڈاکٹر کیتھرن گوڈاینف نے ماضی میں ایران میں کام کیا ہے اور وہ اب برٹش جیولوجی سروے کی پرنسپل جیولوجسٹ (ماہرِ ارضیات) ہیں۔ ان کے مطابق لاکھوں سال قبل کم گہرے سمندروں نے خلیج فارس میں نمک کی موٹی تہیں بنا دی تھیں۔
یہ تہیں معدنیات سے بھرے آتش فشاں کے پتھروں سے ٹکرائیں اور ان کے میلاپ سے رنگ برنگا زمینی رقبہ قائم ہوا۔
ڈاکر گوڈاینف کا کہنا ہے کہ ’گذشتہ 50 کروڑ برسوں کے دوران نمک کی تہیں آتش فشاں کی مٹی میں دب گئیں۔ چونکہ نمک پانی کی سطح پر تیر سکتا ہے اس لیے وقت کے ساتھ چٹانوں میں موجود دراڑوں سے باہر نکلتا رہا اور اس نے سطح پر پہنچ کر نمک کے ٹیلے بنا لیے۔‘
ان کا کہنا ہے کہ زمین کے نیچے نمک کی موٹی تہہ خلیج فارس کے اکثر حصے میں موجود ہے۔
اس جغرافیہ سے یہاں سونے کے رنگ کی نہریں، سرخ ساحل سمندر اور سحر انگیز نمک کی کانیں وجود میں آئی ہیں۔ ہرمز کو درحقیقت رینبو آئی لینڈ (قوس قزح کا جزیرہ) اسی لیے کہا جاتا ہے یہاں غیر معمولی رنگوں کا حسین امتزاج پایا جاتا ہے۔
اور تو اور یہ دنیا کا واحد پہاڑ ہے جسے کھایا جا سکتا ہے۔ یہی وجہ ہے کہ ٹوور گائیڈ نے مجھے یہ چکھنے کا مشورہ دے رہا تھا۔
اس پہاڑ کی سرخ مٹی جسے ’گیلک‘ کہتے ہیں، ہیماٹائٹ کی وجہ سے ایسی دکھتی ہے۔ خیال ہے کہ یہ جزیرے کے آتش فشاں پتھروں میں پائے جانے والے آئرن آکسائیڈ کی وجہ سے ہے۔ یہ ناصرف صنعتی مقاصد کے لیے قیمتی معدنیات ہے بلکہ مقامی کھانوں میں بھی اس کا کردار اہم ہے۔
اسے کھانوں میں مرچ کے طور پر استعمال کیا جاتا ہے۔ یہ سالن میں زمین کا ذائقہ دیتا ہے اور مقامی ڈبل روٹی تومشی کے ساتھ انتہائی لذیذ ہوتا ہے۔ تومشی کا معنی ’کسی چیز کی زیادہ مقدار‘ ہے۔
فرزاد کی اہلیہ مریم نے بتایا کہ ’سرخ مٹی کو چٹنی کے طور پر استعمال کیا جاتا ہے۔‘
’اس چٹنی کو سرخ کہتے ہیں اور اسے ڈبل روٹی پکنے کے دوران اس پر پھیلا دیا جاتا ہے۔ کھانے میں استعمال کے علاوہ مقامی فنکار اس سرخ مٹی کو (تصویر بنانے میں) استعمال کرتے ہیں، ان کے کپڑے رنگے جاتے ہیں اور اس کی مدد سے سیرامکس اور کاسمیٹکس کا سامان تیار کیا جاتا ہے۔‘
مقامی لوگ سیاحوں کو گھر کا بنا کھانا اور گھومنے پھرنے کے لیے اپنے موٹر سائکل اور رکشوں کی پیشکش کرتے ہیں۔
شان نے مجھے بتایا کہ ’ہم ہرمز کے لیے ایسا کرنا اپنی ذمہ داری سمجھتے ہیں۔ یہ بہت نایاب اور ہماری شناخت کا حصہ ہے۔ ہم اس ماحولیاتی ورثے کی جانب دنیا کی توجہ مبذول کرانے میں اپنا فوری کردار ادا کرنا چاہتے ہیں۔‘
